Tuesday, November 07, 2006


هذي كلمات لا ترقى أن يطلق عليها اسم رسالة، اكتبها بلغة مثل ما ودي أقولج إياها بالصج.. وراح أنشرها في مدونتي رغم اني أعرف عواقبها ... بس اذا بتقرينها لازم تقرينها وتتخيلين اني قاعد مجابلج بمكان ما رحنا له من قبل .. مكان مثل أحلامج .. بعيد وواضح وذكراه ملخبطة..

أحتاج اقول لج اللي بقلبي، اللي يقدر يطلع على شكل أحرف على الأقل. في شعور أظن انك تعرفينه .. وأنا كل يوم قاعد أعرفه زيادة ..

هالشعور يذبحني..

اني احاول اكتب ولا يطلع شي ..اني احاول اني أسيطر على احساسي ويتمرد علي، وان البكاء عندي كأنه فرس متأهب، بأي لحظة يفلت ... واني قاعد انصاب بشلل .. وكل ما أذكرج اتييني حالة خدران، اضطر اني اقط روحي على فراشي ، مثل اليهال، مثل الورد الذابل، شعور صفصافي، مو لأنه ذكراك حزينة، العكس، بس يجيني انكسار لا يفسر.. تماماً مثل ما ماني قادر أفسر شوقي لصلاة الطفولة مع جدّي في المسجد..

وأني أحاول اكفر فيج مرّات .. أيه أكفر، كعادة الجاحدين بكل شيء حقيقي، كعادة الشاب اللي يدور على الفشل بالنجاح المستحق الأقرب لقصص الروايات، بل هو أكثر... بعد كل المحاولات الكفرية، أكتشف شكثر انا محترق وخالص.. ويطري علي قول المتنبي: "أنا الغريق فما خوفي من البلل"

ويذبحني شعور انج مو يمّي ألحين وامس وباجر..

واني ما قمت أهتم بالقراءات ولا سياسة ولا زفت، ولا قام يجيب راسي أي نغم، وكل اللي في بالي اني أبيج يمّي.. بالسيارة بالبيت بالشاور، بالفراش أول ما أقوم من النوم، بالانطلاق الفكري قبل لا أقول سالفة –وعادةً أسكت-، لما أجابل المرايا وأنا ألبس عقالي... في عنصر قهر وذبول وانتشاء وضياع وخوف وانطلاق وعفوية والأهم من كل هذا، شعور حب يلفني لفّ..


في أسئلة أفكر فيها انا مثل .. "متى بديت أغار؟" وليش صاير ما أفكر بمنطق وليش حجارة الأجداد الخايسة قاعدة تكبر فيني؟ اكتشفت اني اوبن ماينديد على الطل! كله منج .. مرات أفكر ماكو الا اني اصير سلفي وارتاح ;p.. واااايد أريح! والله تعبت.. والله.. بس مو هذا الموضوع..

حبيبتي ...... تدرين لما أقول حبيبتي.. أحس والله ما في كلمة تركب مثلها في لحظتها ! أحس اني اذا ما قلتها اكون قاعد اتصنع..

حبيبتي انتي .. حبيــــبتي أنا ..

هذا كلام واحد صحى الساعة 2 آخر الليل يحاول بكل ما فيه من عجز ان يكتب، ويدري انه سيمر اليوم بدون ما يشوفج.. وما عنده طريقة لانهاء "الرسالة" لأن أساساً ما ودّه تنتهي .....

وايد .. وايد ... وااايد

:*

27 Comments:

At 2:15 PM, Blogger Delicately Realistic said...

I feel your pain.
:/
Thag kholgi tsadig?
I wish i had words of encouragment to say, but i dont :/
Lets just hope that someday things get better.

 
At 3:09 PM, Blogger 3AJEL said...

فاز باللذات من كان جسورا
ولاحياة مع اليأس ولا يأس مع الحياة

 
At 2:12 AM, Blogger طائر بلا أجنحة said...

طلعت أردى مني ....
بس عزائي إختياراتك الصحيحة دائماً
و لومي لنفسي إختياراتي الخاطئة دوماً

لي مرور أخر بعد أن تنفك الأبتسامة التي حفرتها على وجهي قسراً
رغم ألم المقارنة

و نبي بالديرة........

 
At 12:50 PM, Blogger Q80-Chill Girl said...

This comment has been removed by a blog administrator.

 
At 12:53 PM, Blogger Q80-Chill Girl said...

This comment has been removed by a blog administrator.

 
At 12:55 PM, Blogger Q80-Chill Girl said...

مبتدئ

العفوية جبّاره :) اتمنى ان تأسرها كما أسرت ابتسامتي عندما قرأت "الرساله/ همهمات?"

لمّا تملك عامل الصدق او الخيال الصادق لما تعبّر اعتقد انك تثير حياء الجزاله، فتتنازل عن العرش لتتوج الصدق

وختاماً اشدد على ماذكره عاجل
:)

(ايكون افهم اعبر عدل و اعرف قواعد و اجيد تشكيل الكلمات! النتيجة؟ تعليق كتب 3 مرات)

 
At 9:27 PM, Blogger neelaah said...

مبتدئ
انت رائع وجميل و انت عاشق

اما الشخصيه الموجهه لها الكلام
الرجل الصح لا يأتي الا مرة واحده في الحياه ، و اذا ما اغتنمتيها عمره هذا الرجل ما راح يفارق ذاكرتج
راح تستعدينه في مواقف كثيره بالمستقبل
راح يلازمج السؤال الشيطان
ماذا لو؟؟

ما من شئ اجمل من الرجل البسيط الواضح اللي راسم خطوطه صح
وعارف و ين يبي يروح و وين يبي يوقف

 
At 1:32 AM, Blogger iDip said...

اخوك "قصمصم" يسلم عليك
ويقول لك هو الجواب على بعض أسئلتك

تعرفه صح؟
;)

 
At 4:18 AM, Blogger Zalabya said...

Thayagt khelgi ana ba3ad
yeDhreb el 7ob sho bezell

 
At 4:35 AM, Blogger مبتدئ said...

DR-

THank you for your words but i assure you there is no pain involved, and no encouragement needed :), maybe a bit of discouragement ;p

The feeling is not pain its more like .. something beautiful

عاجل

افا عليك بس
:)


طائر
هو أهم شيء في الموضوع انه هم نبي بالديرة ... في كل الحالات

Q80-Chill

شكراً لك وعلى جزالتك.. ِشفتي الشعور لما كنتي تكتبين تعليق وتمسحين وتتأكدين من اللي كاتبته؟ أنا صار فيني.. في هالحالات لا بديل الا للعفوية


نيلة

أنا ما أقول لج إلا : ما شفتيها بس وهي تضحك.. حين تضحك ........ـ
وشكرا على الرقي


iDip
أول شيء من زمان عنك ولك وحشة
وبعدين على قصمصم.. ذبحني.. كلب

زلابيا

ليش ضيقة الخلق؟
ما أقصد
لا لضيقة الخلق تكفين

 
At 6:39 AM, Blogger Hanan said...

How painfully beautiful and beautifully painful. If your beloved is attainable, I hope you have a wonderful time together. If she's out of reach, try try and try again.

 
At 3:32 PM, Blogger The Mariner said...

للأسف .. اللنك مو شغال ... ما عليك أمر ... ممكن تعيده !!

 
At 6:18 AM, Blogger Muhammad Aladdin said...

آآآآه يا مبتدئ

:)

 
At 2:02 PM, Blogger Shurouq said...

الله


بس عجبتني فكرة التحول إلى سلفي ;) وايد وايد وايد

 
At 9:10 AM, Blogger White Wings said...

تدري يا مبتدئ، يظل الوضع أحلى وأجمل وأمتع من أن لا تجرب هذا الشعور أبداً، الحب نعمة والعشق أجمل صور الحب، والعذاب من أجل الحبيب هو أرقى ألم نفسي
أدري هذا الكلام لا يودي ولا يجيب، بس صدقني، ولا انك تعيش بدون هذا الشعور مطلقاً
لقاء قريب ان شاء الله، لا تفقد الأمل

 
At 5:38 AM, Blogger Brava Valentia said...

حبك عنيف ;-p

 
At 3:09 AM, Blogger tasty_as_berry said...

موضوع طالع من القلب .. اهنيك على هالصراحة مع ذاتك وفي البلوق .. شي حلو يخليك ترتاح ..يعطيك العافيه :)

 
At 5:27 PM, Blogger badly.drawn.woman said...

akheeee... 3awar galb... beautifully written... all the best of luck for you two... o inshalla u'll get her... she can't read this and not move... you have to... both of you... yalla!

 
At 5:46 AM, Blogger مبتدئ said...

Hanan

Thanks a lot for the beautiful comment

The Mariner

حاضر ولا يهمك


محمد علاء

وحشتني يا راجل..
من زماان ما مريت... أنا دايم متابعك
أتمنى أن تكون سعيد جداً جداً جداً



شروق

شكراً وايد.... سهلة سلفي بالنسبة لي


Whitewings

حاسس بروح اللي تبين تقولينه.. روعة الشعور أدري

شكراً

brava

بالعكس.. جداً رقيـــق .. إلى أقصى حد

tasty_as_berry

فكرت بموضوع الصراحة مع الذات في المدونة كثيراً، وترددت اني انشر هالموضوع لأنه فيه عري باذخ، صعب ان الواحد ينشر بهالطريقة.. بس شماخذ منها؟
آخرتها موته..


badluy drawn women

Thank you : )..

 
At 8:05 AM, Blogger Kthekuwaiti said...

One day you will realize that the girl isn't worth the effort; then you will be set free. (oo lat 9eer 9alafi..)

:*

 
At 6:43 PM, Blogger PerseusQ8 said...

مسيو مبتدئ

أولا: النص يعور القلب. و قصتك قديمة قدم الأزل :

"دخيلك يا إمي مدري شو بني
اتركيني في همي. زهقانه الدني

مدري من سنه. أو أكتر من سنه
شفته تحت اللوزة بهالفي الهني
مدري شو عطاني يمكن سوسنة

و من يوما يا إمي مدري شو بني"

و شي إز نتس إف شي دزنت فيل ذا سيم واي. الله يوفقك

و دخيلك لا تصير سلفي.. حتى المزح بهالمسألة يخرع

و على فكرة البودكاست إز أ جريت آيديا بس ذا أوتو بلاي فيتشر از فري اننوينج

"Wanna get HOSTING for your podcast? no wait, ... etc" can drive you nuts!

مافي طريقة تو سويتش إت أوف باي ديفولت؟

 
At 12:50 AM, Blogger Alia said...

العامية وايد حلوة

عورت قلبي الله يسامحك .. ولو ان عذرك معاك كون قلبك متعور قبلي

عشت معاك لحظات حبك .. لحظة لحظة لما قريت البوست

وتتحول سلفي .. لا لا لا ما نبي
خلك شذي وايد أحسن .. مو ناقصين

دمت بإبداعك

 
At 3:17 PM, Blogger tweety said...

مادري ليش أنا ما حسيت في ضيقة خلق

بالعكس استانست لك وعقبال ما ينوبنا من هالاعراض جانب

بس ليش دايما التعبير عن الحب خاصة عند الجنس الخشن يعتبر فيه ضعف وانكسار ؟؟

 
At 2:15 AM, Blogger Miss Writer said...

الحب..هذا الأرعن الصغير
ينقض كاسرا على القلوب فيمزقها وينفض عشقها الساكن في فضائنا ليستحيل ألمنا لذة وحزننا فرحا حزين

أن تملك قلب عاشق حزين خير من أن تملك في قلبك برد السنين

عندما تحس بأن جرحك غائرا وعميقا فلتعرف يا مبتدئ أن حبك كبيرا وعظيما

اتمني لك قلب راقص على أهزوجة فرح لا على نغم حزين

يندر أن نري رجالنا يعترفون وينكسرون ويركعون بوضوح في معابد العشق والكبرياء..نادر يا مبتدئ وتمنيتها عظيمة بقدر عظامة محبتك

 
At 1:31 PM, Blogger kuwait said...

والله مصيبه هالوهم اللي اسمه احبه ويحبني

ونام الليل افكر فيه الحمد لله والشكر

الحب هو حب في مايرضاه الله حب الله وسوله

حب عايلتك حب الزوج والزوجه محبة لوجه

الله لارياء ولافسق فيها محبة أخوه صادقه

وماغيرها تفاهه يندم صاحبها يوم

لاينفع الندم..

طبعا لااوجه كلماتي لكاتبتنا اوجهها

رساله عامه أكن لك كل احترام ومدونه

جد مميز

 
At 6:35 PM, Blogger مبتدئ said...

kuwait

جزاك الله خير
استمر في نشر الخير

 
At 10:05 AM, Blogger DK said...

ويذبحني شعور انج مو يمّي ألحين وامس وباجر..

واني ما قمت أهتم بالقراءات ولا سياسة ولا زفت، ولا قام يجيب راسي أي نغم، وكل اللي في بالي اني أبيج يمّي.. بالسيارة بالبيت بالشاور، بالفراش أول ما أقوم من النوم، بالانطلاق الفكري قبل لا أقول سالفة –وعادةً أسكت-، لما أجابل المرايا وأنا ألبس عقالي... في عنصر قهر وذبول وانتشاء وضياع وخوف وانطلاق وعفوية والأهم من كل هذا، شعور حب يلفني لفّ..

hl klaam lafni laaf !

so romantic :')

 

Post a Comment

<< Home