طاف

ليش ما أكتب شيء في مدونتي ؟

ما أبي أبرد، المدونة أحسها صارت مو لي، نص اللي اعرفهم يعرفوني فالاسم المستعار ما له داعي،بس هم بعيش على الأمل.

ودي اكتب، أبي أرد أحتل مكاني اللي برد، لكن شقول..بس ودي أكتب، والساعة الفجر وأنا مو نايم وحالتي حاله

لاعت جبدي من سوالف السياسة في الكويت، ما في قضية صجية، هواش ومضيعة وقت على أشياء ما تعني لي شيء، مو طموحي بالحياة اني اشتط على سوالف ما تعنيني، وأكثر شيء أكرها المزايدات،أقول جب بس لا تزايد، وأسوأ مزايدة هي المزايدة على الدين ، يأتيك واحد ويقول لك : الإسلام هو الحل، يعني يكون صايدها، خلاص نقفل الدنيا، ونسدل الستار، لقينا الحل، يعني على بو انه حاطني بزاوية ومحرجني، أقول جب بس.. تستعبط ؟

بعد الأسوأ لما تصير المزايدة على الالحاد، على بو يعني الأخ توه كافر ويبي يتشيحط، ويزايد.. نفس اللي يزايد على الدين

بعد في اللي يزايد في الموسيقى، يعني هو يكون يعرف الفن الأصيل وبس، ويحط نفسه بمكان أعلى منك ويعطيك نظرة استعلاء موسيقية، يا عمي روح، لا تزايد! أعرف موسيقى كثرك كلك.. يعني ما تسمع الا مقامات.. هييه برافو يا أيها المتمسك بالمبادئ ، استانس بحياتك بس لا تزايد ...

في اللي يزايد على المحافظة.. وسوالف ترضى على اختك؟؟؟ لاااااااااااااا ما أرضى! شتبي !ـ وأرضى شتبي؟ مالك شغل شتبي ..! (أتذكر مشهد لمسرحية حسينو اتوقع هلو دوللي، لما يصارخ علي المفيدي يقول عطني فلوسي ومالك شغل)
"المدارس الخاصة أخلاقياً مو شي" يا اخي ليش ما تكتب وتبلور نظريتك عشان تفيدنا، يا اللي اخلاقياً شي، "ما يجوز شباب وبنات وفري" طيب ليش ما تروح تعيش وتفكنا؟ روح عيــــش اسقي زرع، عمر الكون ، بس لا تزايد، وخّر يرحم والديك.

ليش هذه المواضيع اللي ما لها دااعي! بعدين يجيك واحد والا وحده يكون يعطيك الراي المعتدل اللي يناسب اللي قاعدين اجتماعياً عشان مثلاًُ البنت وراها زواج فلازم تقول كلام الزوجة الصالحة والعكس صحيح "والله شوف يعني يصير جذي ويصير جذي، وهو مرات يفيد ومرات يضر، ناخذ خيره ونبتعد عن شره ، وهو سلاح ذو حدين، ان يدل على شيء فانما يدل على" مثل اللي تقول لي والله حقوق المرأة انا ضدها لانه ما يلوق، يعني شلون ما يلوق، فتقول ما ادري أحس انه ما يلوق، يعني احساسها البكر يقولها ما يلوق، خلااص من باجر بنعرض كل قضية عليج وقولي يلوق والا ما يلوق، عطيني احساسج يا ام الاحاسيس، انزين يلوق مثلاُ أقول لج انج انتي غبية؟ انا احساسي كاذب، .....عموماً افهم انه شخص يعارض ويؤيد بس مو ما يلوق، والله قلبي يعورني من حجم النرفزة اللي تحوشني، وتتكلم مثل حليمة بولند وهي سحت، الله هذي يبيلها بوستات.

وغير جذي يا ناس يا عالم ويا أنا بحاول كثر ما أقدر اني ما أزايد، والى كل المزايدين: انتو كللللكم احسن مني في الفن والدين والاخلاق والمحافظة.. هنيالكم، مبروك، الله يسعدكم ويبعدكم
.
هذا البوست واضح انه على المزايدة بسميه وعنونه بعنوان: لا تزايد
باجر بقراه مرة ثانية وبعدلهـ